PC (Linux) · 2020
Suzerain
Goberna Sordland en galego: conversas, xornais, leis, finais e o códex enteiro.
Unha persoa xogouna enteira, de principio a fin, sen atopar textos rotos nin letras raras.
Xogada enteira o 25/10/2026
Capturas
Sobre a tradución
Suzerain é un xogo de política sen disparos: es Anton Rayne, presidente recén elixido de Sordland, un país que acaba de saír dunha ditadura, e cada conversa cos ministros, os xornalistas ou a túa familia vai decidindo que tipo de goberno fas. Ten moitísimo texto, e todo importa.
Está traducida toda a historia de Sordland, que é o xogo base. Fíxose con intelixencia artificial a partir da tradución ao castelán do mesmo proxecto, xa revisada, coidando o trato: os ministros tratan o presidente de vostede, e a familia e os amigos, de ti.
A versión 1.0 corrixe os dous erros que se atoparon ao xogala enteira: as palabras resaltadas saían entre asteriscos (*así*) en vez de entre comiñas (“así”), e moitas frases empezaban por «Bo,» onde en galego se di «Ben,». Se tes posta a 0.9, abonda con instalar a 1.0 por riba.
A 1.0.1 trae a mesma tradución cun instalador novo: xa non fai falta que o xogo sexa de Steam, porque o busca tamén en Heroic, Lutris, Bottles e Wine, e deixa escoller calquera outra carpeta. Se a copia non é a versión coa que se probou, avisa e pregunta antes. Se tes posta a 1.0, non tes que facer nada.
Se tes posta a tradución ao castelán, o instalador galego aproveita os ficheiros orixinais que gardou ela. Para pasar do galego ao castelán, desinstala antes o galego.
Que está traducido
- Toda a historia de Sordland: o prólogo, os once turnos, os epílogos e os nove finais da xubilación
- Xornais, informes, diario, decisións, decretos e leis
- O códex enteiro, as políticas e as situacións
- A interface: menús, mapa, paneis do goberno e da Asemblea, e os cargos dos personaxes
Que queda en inglés
- O DLC Kingdom of Rizia: traducimos só o xogo base, Sordland, porque o DLC non o temos e non o poderiamos probar
- Uns poucos rótulos e avisos que escribe o propio programa do xogo, como «Open City Information», «Read the report.» ou «Are you sure…?»: non están nos ficheiros de texto que traduce o instalador, senón dentro do código, e cambialos obrigaría a modificar o programa, co risco de rompelo
- As etiquetas da personalización do presidente (Hair, Attire, Background…): o xogo xéraas no código a partir dunha lista interna, así que pasa o mesmo
- Os nomes das etnias e relixións nas fichas das cidades do mapa (Sordish, Bludish, Agno-Sordish…): o xogo úsaos por dentro como identificadores e, se se traducen, a partida bloquéase ao comezar a primeira quenda
Como se instala
Linux e Steam Deck- Descarga o paquete e descomprímeo onde queiras.
- Pecha o xogo.
- Fai dobre clic en
instalar.sh(se pregunta que facer, escolle Executar). Ábrese unha xanela de terminal onde só tes que ir respondendo: busca Suzerain el só (Steam, Heroic, Lutris, Bottles, Wine…) e pregúntache en cal das copias o pon; escribe o número e preme Intro. Se o tes noutro sitio, escolle «0» e indícalle a carpeta; vale tamén unha que a conteña, como o disco onde o gardas. - Abre Suzerain. Vale tamén coas partidas xa empezadas.
- Para volver ao inglés: dobre clic en
desinstalar.sh.
A primeira vez descarga UnityPy (uns 30 MB), a ferramenta que edita os ficheiros do xogo, e gárdaa aparte. Se o xogo se actualiza e volve o inglés, abonda con executar outra vez instalar.sh. Na Steam Deck faise desde o modo escritorio. Se o dobre clic abre o texto do ficheiro en vez de executalo (pasa en GNOME), fai clic dereito nel e escolle executalo como programa, ou abre unha terminal na carpeta e escribe bash instalar.sh.
Xogáchela enteira?
Axuda a probalaSe rematas o xogo con esta tradución, avísanos: así sabemos que se xogou de principio a fin e onde, e a ficha pode levar o selo «probada por humanos».
Comentarios
Para comentar precísase unha conta de GitHub (é de balde). Os comentarios gárdanse no foro do proxecto.